لما تكوني في محاضره من النوع البايخ....يبقي مفيش قدامك غير انك تخترعي أشخاص
لا وجود لهم ومالهمش أدنى علاقة بالواقع و أحداث بعيدة تمام البعد عنه ...و أنتي عارفه كويس أنهم ليسوا سوى خيال و وهم .....فى النهاية لو عندك دكتور نفساني زي محمد عبد الوهاب في فيلم الورده اليضاء حيقولك ان اللي عندك ده ناتج عن طاقة زائدة لديك و المفروض انك تبطلي تاكلي في الكافيتريا
ده بالظبط اللي حصلي في محاضره الثرمو... الدكتور انا مش شايفه منه غير قفاه ..لاكن تخيلت انه الرئيس السابق بوش و قعدت افكر مين من الشباب حيقلع الجزمه و يديلوا علي قفاه..لكن فين الكلام ده ..خلاص راحت ايام احمس و تحتممس
نفسي اعرف فايده الكلام الفاضي ده ..كان فيه زمان اعلان عن نوع من الكحوليات مش فاكره اسمه ..بعد كده طلع نوع تاني بس للرجال فقط ..يقولك استرجل و اشرب بريل... انا عندي فكره روح هات أربع خمس ستّ جالونات سبرتو او جاز وإدلقهم على مكتبة بيتكم ده طبعا اذا كان فيه في بيتكم مكتبه...ادلقهم على "بدائع الزهور" لإبن إياس..و"إغاثة الأمة" للمقريزي و"شخصية مصر" لحمدان ..وكولكشن لطيف من ألبومات صور العيلة ومجلدات مجلة "سمير" بعدها ولّع في أمّهم أو ترجع للحل الأبسط والأوسط بيعهم وإشرب بتمنهم بريل
كل ده و المحاضره لسه ما خُلصتش وانا حنام وانا قاعده فكرت اكتب جواب لاحب مؤلفي الموسيقي عندي وهو شوبان,,في كتير بيتصوروا جنوني بيه مرض و بيتجراؤ يقارنوه بولفجانج ..جهل وبعدين ايه اللي يعرفه موزارت اصلا عن الستات او المرض او الدم او الجنون؟ الحاجات اللي بتصنع موسيقي عظيمه...جقيقي مش عارفه اكتب ازاي لعبقري زي ده وهو غالباً مش حيقري الجواب كله غالباً بعد أول فقرتين، حايتاوب وده يشعرني براحةِ ما، ففكرة أن تبوح بأدق أشياؤك في حضور شخص أصم، هي حتماً تجمع الحسنيين، البوح والمجهولية
ولسه المحاضره ماخلصتش افكر في اي نكتة سخيفة ...و أقعد أضحك عليها ....أنتي عارفه القاعدة... سالب في سالب يساوي موجب....سخافة السخافة تساوى لحظات مرح
المحاضره خلصت و انا افكر
طظ في المحاضرات
4 comments:
بادىء ذى بدأ انتى عارفة ان التيمبليت اللى انتى حطاه دا انا فترة كنت هحطه لان انسيابية جسم البنت ونظرتها كانت عجبانى لكن اللى رجعنى فى قرارى انها يابانية فمتقبلتش الفكرة مش عنصرية منى طبعا لكن لانى مبحبش ابص لنفس الشكل كتير والشكل اللى اقدر ابص له كتير لازم يفضل مريح عينى على طول مش ابص له يوم واللا يومين واتخنق منه
الاضافة اللى انتى عملتيها وعايزة اسألك عليها انتى ليه حتى صور البنات فى البوستات برضه جايباهم شكل اليابانيين ؟؟ عايزهم يعنى يسلوا اختهم اللى واقفة فى التيمبليت واللا انتى بتحبى شكلهم ؟ واللا عايزة التيمبليت بالبوستات يكون فيهم بينهم تناغم ؟؟ واللا ليكى رأى تانى ؟؟؟
هروح اعمل حاجة واجى اكمل كلام
بـــاك
نرجع للبوست بتاعك
دلوقتى انا مش فاهمة انتى كنتى مخنوقة من المحاضرة واللا من الشخصية اللى بتدى المحاضرة علشان تفرق
انا ملاحظة ان ميولك ادبية وفنية الى حد ما طيب ليه دخلتى الكلية اللى شكلها مش نازل من زورك دى ومدخلتيش كلية تحبيها ؟؟
لاحظت كمان ان شكلك دايما بتكتبى البوستات على البلوج على طول ومش بتراجعيها وانا عمالة الملم وراكى فى نقط زيادة وحروف طايرة وانا ضيفة عندك ميصحش ترهقينى معاكى
مساء الورد
يعني يا ست سما انتي لا عاجبك العجب
ولا الصيام في كيهاك. انا حاسه من الاول
إن عندك ميول عنصريه!! مالهم اخوانا في
الانسانيه اهل اليابان؟ ناس عايشه علي الاسماك
وانا اموت في السمك..ياسلام علي وقاره تتعمل
سنجاري عند قدوره..جربي و ادعيلي
وبعدين اخوات مين ..دي شكل واحده عايزه
اخوات برضه؟ ..دي واحده نازله حافيه و بقميص
النوم علشان تعدي الكورنيش و ترمي نفسها في
احضان النيل السعيد!!
ليه دخلت هندسه؟ المجموع يا شابه ... وبعدين انا
لو كنت دخلت اداب مثلا ..كان ابويا جاتله سكته و
الست الحاجه كانت ضربتني بايد الهون بعد ما تعمل
الكفته.
آه ان باكتب البوست هنا علي طول...مراجعه إيه
بس يا ست سما؟ هوا انا داخله امتحان؟ وبعدين كده يبقي
Dynamic Post
يعني فيه تفاعل بين العبقريه اللي هي انا و الجماهير يعني الجمهور.. "شوور" يعنى الجماهير الغفيرة.. "وفيرة" يعنى الثقافة الجماهيرية.. "إية"
ان كنتي لسه ما فهمتيش انا قصدي ايه يبقي
لابد اني اعزمك علي واحد حلبيسه وكوز دره
مشوي من عند ام عرفه
يالا لملمي بقي الحروف يا ست سما
مسائك احلي من ازهار الزنبق الطافيه علي
نيل القاهره ساعه مغربيه
علي فكره سؤال وجيه "انا كنت متضايقه من مين؟ المحاضره ولا الدكتور؟" ولآنه سؤال وجيه فيلزمه اجابه في بوست لوحده و دلوقتي اقولك حته من ديوان "ريان يا فجل" ل فؤاد حداد
"الصبر شعشع فى الجيزة
خدنا المحاضرة فى كراسة
تحــت الأشعــة الحسّــاسة
وش القمر قال يا سيــاسة
حُب الوطن خطوة عزيزة"
ودقى يا مزيكا وكيدى لى العوازل وسمعينى أتخن سلام على أنغام "يا أحلى إسم فى الوجود" أغنية "لو مكنتش أنت تدلعنى مين حيدلعنى ؟"...
Post a Comment